Wednesday, October 5, 2022
spot_imgspot_imgspot_imgspot_img

Latest Posts

EDITORIAL / A janë OJQ-të vegla e rrjetit Global të Rusisë në Ballkan!

Shkup, 12 shtator – Sulmi agresiv i Rusisë në Ukrainë ka ngritur alarmin se duhet të kemi kujdes nga çfarëdo ndikimi rus që vjen në rajon dhe në shtetet tona. Në pamundësinë për të pasur ndikimin e saj ushtarak dhe të forcës në rajon, pasi shumica e shteteve janë anëtare të NATO-s, Rusia ndikimin e saj në Ballkanin Perëndimor mundohet ta bëjë nëpërmjet mediave, OJQ-ve, grupeve të lobimit, emocioneve të njerëzve në lidhjen kishtare, që dmth kryesisht me të ashtuquajturën “soft power” ose “fuqia e butë”. Por, ky ndikim mund të eskalojë në çdo moment dhe pikërisht për këtë arsye duhet të gjithë t’i hapin sytë mirë nga ky rrezik!

Rusia ka qendër në Nish e cila përdoret për spiunazh!

Qendra Humanitare e cila ndodhet në Nish është duke u përdorur nga Rusia për qëllime të shërbimeve sekrete. Supozimet janë se në këtë Qendër bëhen trajnime të personelit me armë të gjata dhe se është një qendër klasike e spiunazhit rus, e cila përdoret për punët e shërbimit sekret rus. Interesi i Rusisë është që kjo qendër të marr statusin diplomatik, e kjo që atëherë nuk mund të hy më askush në atë hapësirë dhe të gjitha dërgesat me aeroplanë dhe helikopter nuk mund të kontrollohen. Kjo i bie që Rusia në Serbi ka ‘shtet brenda shtetit’.

Rusia mundohet me lajme të rrejshme të mashtrojë qytetarët

Lajmet e rrejshme të cilat i lëshojnë portale, media dhe qendra të ndryshme anti-evropaine dhe anti-NATO gjithnjë e më shumë bëhen armë e rrezikshme për lëkundjen e besimit të qytetarëve ndaj institucioneve.

NATO në Shkup organizoi konferencë në të cilën theksi është vënë në krijimin e mekanizmave frytdhënëse për t’u përballur me fenomenin e lajmeve të rrejshme, dhe për të luftuar fushatat dezinformuese, të cilat kryesisht vijnë nga qendrat, që janë kundër integrimeve evropiane dhe NATO-s.
Që nga fillimi i i luftës në Ukrainë, numri i faqeve në internet që përhapin dezinformata për Rusinë dhe Ukrainën është rritur më shumë sesa dyfishi. Raporti NewsGuard kanë identifikuar 250 faqe të internetit që kanë publikuar materiale dezinformuese për këto dy shtete. Platformat sikurse, Google, Twitter, Facebook dhe TikTok, kanë vendosur “në disa shtete masa të përkohshme kundër platformave të propagandës ruse sikurse RT dhe Sputnik, pasi Komisioni Evropian ua ka ndaluar transmetimin këtyre dy mediumeve të financuara nga Kremlini”.

Nga gënjeshtrat më të mëdha të Rusisë janë pretendimet se Shtetet e Bashkuara kanë laboratorë në Ukrainë për zhvillim të armëve biologjike, se trupat ruse nuk janë përgjegjëse për masakrën e civilëve në Buça në muajin mars, se rusët nuk kanë sulmuar stacionin e trenave në Kramatorsk në lindje të Ukrainës etj.

T’i besohet NATO-s dhe aleatëve

Mënyra më efektive për NATO-n ose ndonjë qeveri nacionale që të përballet me këtë situatë komplekse, është që ta fitojë besimin te njerëzit dhe të ketë narrativë të fortë për atë çka përfaqëson dhe përse njerëzit duhet t’ju besojnë dhe t’ju mbështesin.

NATO është ombrella e sigurisë së Maqedonisë së Veriut, Shqipërisë, Kosovës dhe gjitha vendeve tjera të rajonit duke mos përfshirë vetëm Serbinë, e cila ende nuk pajtohet me realitetin e ri në Ballkan. Duke qenë pjesë e kësaj organizate më të fuqishme të sigurisë në botë, njerëzit duhet të kuptojnë se shtetet pjesëtare të kësaj organizate janë aleatët e Maqedonisë së Veriut. Neni 5 i Traktatit të Atlantitkut të Veriut mes tjerash thotë se një sulm i armatosur kundër një apo më shumë prej anëtarëve të NATO-s në Evropë apo në Amerikën e Veriut do të quhet si sulm kundër të gjitha atyre dhe si pasojë bien dakord që, nëse ndodh një sulm i tillë, secila nga ato, në ushtrim të të drejtës së vetëmbrojtjes kolektive apo individuale të njohur nga Neni 51 i Kartës së Kombeve të Bashkuara, do të ndihmojë Palën apo Palët e sulmuara në këtë mënyrë duke ndërmarrë menjëherë, individualisht dhe në bashkërendim me Palët e tjera, ato veprime që i vlerëson si të nevojshme, përfshirë këtu përdorimin e forcave të armatosura, për të rivendosur dhe ruajtur sigurinë në zonën e Atlantikut të Veriut.

Kjo nënkupton se çdokush që e sulmon Maqedoninë e Veriut, të gjitha shtetet anëtare do i dalin në ndihmë. Prandaj NATO mbetet rruga e nevojshme për të vendosur dhe ruajtur paqen dhe sigurinë ndërkombëtare.

Ndryshe, siguria më e mirë dhe më efikase nga lajmet e rrejshme mbetet transparenca e institucioneve. Ajo në çka duhet të fokusohen të gjitha institucionet është transparenca e plotë dhe digjitalizimi i të gjitha informacioneve që dalin nga institucionet. Nëse keni institucione që janë transparente dhe të hapura, atëherë do të keni dhe qytetarë që do t’u besojnë institucioneve dhe çfarëdo lajmi do ta kërkojnë në institucione dhe jo gjithandej në mediat sociale.

Latest Posts

spot_imgspot_imgspot_imgspot_img

Don't Miss

Stay in touch

To be updated with all the latest news, offers and special announcements.