Friday, March 29, 2024
spot_img

Latest Posts

Omletë me patate dhe djathë

Një ushqim i shijshëm por mbi të gjitha i pasur me vlera ushqyese, me përbërës kryesor vezët, vijon të mbetet simboli i një mëngjesi të shëndetshëm.

Kjo recetë përgatitet shumë lehtë dhe kërkon pak kohë ndërkohë që është e pasur me vlera të shëndetshme.

Ajo përgatitet e kombinuar në mënyra të ndryshme, me djathë të bardhë a kaçkavall e erëza, proshuta të ndryshme e salsiçe etj.

Por AgroWeb.org ju këshillon që mund të kombinoni edhe të gjitha perimet që u gjenden në shtëpi, domate, patate, karrota, kunguj, lulelakër, brokoli etj.

Sa më shumë përbërës të hidhni, aq më shumë e shijshme dhe e shëndetshme do të bëhet omleta.

Më poshtë, AgroWeb.org ju sugjeron një recetë të shëndetshme të përgatitjes së omletës krejt lehtë në shtëpi për të nisur ditën mbarë bashkë me familjen, omletën me djathë të bardhë, patate dhe erëza.

Vezë me Patate dhe Djathë

Përbërësit
(Përbërësit e kësaj recete janë për 4-5 persona dhe përveç vezëve që janë baza e omletës perimet e tjera mund të shtohen sipas dëshirës dhe atyre që keni në kuzhinë)

4 vezë
Vaj ulliri
Pak qumësht
Gjysmë qepe
Dy kokrra patate mesatare
100g djathë i bardhë ose kaçkavall i grirë
Kripë, piper, majdanoz i freskët.
Përgatitja
Grijeni qepën shumë hollë dhe patatet në kubikë ose feta të holla. Në një tigan që nuk ngjit hidhni vajin e ullirit dhe skuqni patatet.

Më pas shtoni qepën e grirë hollë.

Hidhni piperin dhe kripën dhe kavërdisini për pak minuta.

Nga ana tjetër, në një tas rrihni vezët, shtoni miellin dhe qumështin dhe rrihni derisa të bëhet masa e njëtrajtshme.

Hidheni masën e vezëve në tigan dhe trazojeni në sekondat e para. Në momentin që pjesa e fundit nis të skuqet shtoni djathin, fikni zjarrin dhe vendosini një kapak.

Pas dhjetë minutash mundohuni ta ktheni omletën për ta pjekur edhe nga ana tjetër ose paloseni dhe lëreni të piqet edhe pak minuta.

Në fund vendoseni në një pjatancë, hidhini sipër pak majdanoz të grirë hollë dhe servireni me kastraveca ose domate të freskëta por edhe më pak sallatë jeshile apo sallatë spinaqi.

Latest Posts

spot_imgspot_imgspot_imgspot_img

Don't Miss