Wednesday, June 29, 2022
spot_imgspot_imgspot_imgspot_img

Latest Posts

Shefi i Bankës Botërore paralajmëron për recesion ekonomik botëror

Udhëheqësi i Bankës Botërore, David Malpass ka paralajmëruar se lufta e Rusisë në Ukrainë mund të shkaktojë recesion ekonomik botëror, pas rritjes së çmimeve të ushqimit dhe energjisë.

Malpass ka thënë në një takim me bizneset në Shtetet e Bashkuara se është e vështirë “të gjenden rrugë për ta shmangur recesionin”. Sipas tij edhe disa seri të masave izoluese në Kinë janë duke shtuar shqetësimet për situatën ekonomike.

Komentet e tij përbëjnë paralajmërimin e fundit se ekonomia botërore mund të tkurret.

“Teksa shikojmë Prodhimin e Brendshëm Bruto (PBB) është e vështirë të shohim shmangie të recesionit. Vetëm ideja e dyfishimit të çmimeve të energjisë, mjafton për të nxitur recesionin”, ka thënë Malpass, pa dhënë detaje tjera.

Muajin e kaluar, BB ka zvogëluar parashikimet për rritje ekonomike këtë vit, në 3.2 për qind.

PBB-ja është masë për të matur rritjen ekonomike dhe ndër mënyrat më të rëndësishme për të matur sa mirë apo keq është duke performuar një ekonomi, dhe vëzhgohet nga afër prej ekonomistëve dhe bankave. Po ashtu, kjo u ndihmon bizneseve të vlerësojnë se kur duhet të zgjerohen, të rekrutojnë më shumë punëtorë, apo të investojnë më pak dhe të zvogëlojnë fuqinë punëtore.

Qeveritë po ashtu e përdorin PBB-në për të marrë vendime për gjithçka, duke nisur nga taksat e deri te shpenzimet, derisa bankave u ndihmon të marrin vendime se kur të rritin apo të ulin normat e interesit.

Sipas kreut të Bankës Botërore ka thënë se shumë vende evropiane janë ende shumë të varura nga nafta dhe gazi rus. Ai ka bërë këto deklarata, pavarësisht se disa shtete të Perëndimit kanë bërë plane për të zvogëluar varësinë nga energjia ruse. Malpass tha se nëse Rusia ndal furnizimet me gaz, kjo gjë mund të shkaktojë “ngadalësim të konsiderueshëm” të ekonomisë në rajon.

Ai ka thënë se çmimet e larta të energjisë veçse janë duke rënduar mbi Gjermaninë, e cila përbën ekonominë më të madhe në Evropë dhe të katërtën në botë.

Malpass ka thënë se shtetet në zhvillim po përballen edhe me mungesë të ushqimit dhe energjisë.

Rreziqet që vijnë nga izolimet në Kinë

Udhëheqësi i Bankës Botërore ka thënë përgjatë takimit me biznese se është i shqetësuar për masat e izolimit në disa prej qyteteve më të mëdha në Kinë, duke përfshirë Shangain.

“Kina veçse ka qenë duke u përballur me disa tkurrje në sektorin e patundshmërisë, andaj parashikimet për rritje ekonomike atje, edhe para pushtimit rus në Ukrainë, kanë qenë të zbehura. Më pas valët e pandmisë COVID-19 në Kinë kanë nxitur izolime që kanë ulur edhe më shumë parashikimet për rritje”, ka thënë ai.

Edhe kryeministri kinez Li Keqiang ka thënë se ekonomia e dytë më e madhe në botë është goditur rëndë nga masat e fundit izoluese, në krahasim me fillim të pandemisë më 2020.

Ai ka bërë thirrje për më shumë punë nga ana e zyrtarëve për hapje të fabrikave pas izolimeve.

“Përparimi nuk është i kënaqshëm. Disa provinca janë duke raportuar se vetëm 30 për qind e bizneseve janë rihapur… shkalla duhet të arrijë në 80 për qind në periudhë të shkurtër kohore”, ka thënë Li.

Izolime të plota apo të pjesshme janë zbatuar në dhjetëra qytete kineze në muajt mars dhe prill, duke përfshirë edhe mbylljen e Shangait.

Në javët e fundit, zyrtarë të shumtë kinezë kanë thënë se sektorë të ndryshëm të ekonomisë janë prekur nga këto masa, duke nisur nga prodhimi e deri te shitja. /REL/

Latest Posts

spot_imgspot_imgspot_imgspot_img

Don't Miss

Stay in touch

To be updated with all the latest news, offers and special announcements.